GFS стратегиясы бойынша резервтік көшіру

VK Cloud жүйесінде резервтік көшірмелерді сақтау және жою үшін GFS-стратегиясы («ата-әке-бала», Grandfather-Father-Son) пайдаланылуы мүмкін.

GFS-стратегиясында резервтік көшіру иерархияның үш деңгейін қамтиды:

• «Ата» — жылдың басындағы толық резервтік көшірме.
• «Әке» — айдың басындағы толық резервтік көшірме.
• «Бала» — аптасына бір рет толық резервтік көшірме және апта ішіндегі инкременттік көшірмелер.

Резервтік көшірмелерді сақтау мерзімі әр деңгей үшін жеке-жеке беріледі. Әдетте мерзімдер заңнама талаптарына немесе корпоративтік саясаттарға сай болатындай етіп таңдалады.

Көбінесе келесі баптаулар қолданылады:

• Апталық резервтік көшірмелерді сақтау: 4 апта.
• Айлық резервтік көшірмелерді сақтау: 12 ай.
• Жылдық резервтік көшірмелерді сақтау: 5 жыл.

Резервтік көшірмелерді жасау алдын ала бапталған кестеге сәйкес автоматты түрде іске қосылады. Әрбір сәтті резервтік көшіруден кейін ескірген көшірмелерді жою процесі іске қосылады:

1. Апталық резервтік көшірмелердің сақтау мерзімдері тексеріледі.
2. Айлық және жылдық резервтік көшірмелердің бар-жоғы және олардың сақтау мерзімдері тексеріледі.
3. Алгоритм GFS-стратегиясының баптауларына сәйкес қай көшірмелердің ескіргенін анықтап, оларды жояды.

Егер сіз GFS баптауларын өзгертсеңіз, өзгерістер келесі сәтті резервтік көшіру кезінде қолданылады. Егер баптауларда қандай да бір толық көшірмелердің сақтау мерзімі азайтылса, ескірген көшірмелер жойылады.

Жасау және жою процестерінің нәтижесінде сақталатын резервтік көшірмелердің келесі иерархиялық жиынтығы қалыптасады:

• Апталық резервтік көшірмелер — баптауларда таңдалған апта саны үшін толық және инкременттік резервтік көшірмелер.
• Айлық резервтік көшірмелер — баптауларда таңдалған күнтізбелік айлар саны үшін айдың басында жасалған толық резервтік көшірмелер. Инкременттік резервтік көшірмелер жойылады.
• Жылдық резервтік көшірмелер — баптауларда таңдалған жылдар саны үшін (ағымдағы күнтізбелік жылды қоса алғанда) жылдың басында жасалған толық резервтік көшірмелер. Инкременттік резервтік көшірмелер жойылады.